Kabhi-kabhi zindagee mein kuch cheeje apne-aap ho jaati hain, lekin jab aapko uska sahi mayno mein pata lagta hai, aur aap use usi tarike se istemaal karte hain. To, wo aap ki ek ad ya ek style ya ek tarika ban jata hai. jisme aap ko ek maharat haasil rehti hai.

Baat us samay ki hai, jab main college mein tha. Us samay humaari colony ka ek ladka, jo mujhse bada tha, lekin mera dost bhi tha. Use ladkiyaan dekhna, unhe apni ghatiya harkto se impress karna, shayad acchaa lagta tha. Jab kaheen kisi, sundar yuvti ya sundar ladki ko dekh le to, uski koi na koi harkat shuru ho jaati thi. Isliyea shayad usse koi ladki nahi patee, aur bechara aaj, shaadishuda hai aur 2 baccho ka baap bhi hai.

Ek baar usne mujhse poocha, yeh baat 1990 ke aas-paas ki hai ki, agar mujhe cycle de di jaye to, kya main kisi ladki to pataa sakta hoon? Maine badi hi sajahta se jawaab diya ki, is kaam ke liyea mujhe cycle ki koi zarurat nahi hai. Main ladki paidal chalte-chalte pataa sakta hoon. Use bada hi aascharya hua, aur bola wo kaise? Maine jawaab diya wo, mujhper chod do.

Ek din ki baat hai ki, hum dono college ja rahe the, ki maine ek bahaut hi khubsoorat ladki ko, jo humaare hi college mein padhti thi, aur shayad college ke kai ladke uske peeche the, shayad ek nazar mein mujhko bhi pasand aa gayee. Wo ladki college mein Home Science section mein thi. Usne muje dekha, aur meine use, shayad hum bhi use kuch acche lage. Lekin koi baat nahi ho payee.

Ab jab humrara period khatm hota, aur ek 45 minutes ka break milta, wahi uske saath bhi tha. Main apna ek side mein, apne dosto ke saath bath jaata, aur thandi ki dhoop sekte. Wo bhi bahr aa jaati, aur apni dosto ke saath khadi ho kar, hum dono aankh micholi karte.

Ek din muje uske department mein kisi kaam se jana pada, waise us time, main college mein bahaut famous tha. Wo, bhi waheen khadi thi, aur ittefaquan akeli thi. Main apna kaam karke jaise hi wapas aa raha tha ki, usne muje 'HELLO' kaha, jab maine dhyan nahi diya, to usne thoda jor se phir hello kaha. Ab maine, uski aur dekha, aur use hello kaha. Mera hello kehna tha ki wo, seedhiyo mein mere kareeb aa kar boli ki, 'Aap Mujhe Acche Lagte Ho'. Meri to jaise jaan si nikal gayee. Main use dekhta hi reh gaya. Usne mera haath pakda aur poocha 'Sab Theek Hai Na?', maine kaha haan. Aur uske baad wo meri ek acchee dost ban gayee.

Ab humara, ek doosre ko dekhna jyada shuru ho gaya, aur hum dono college mein baat bhi karne lage to, isse kuch ladke, jo uske diwaane the, mujhse jalne lage. Ye sab battein, jab mere us dost ko pata lagee, to wo to jaise, mera shagird ho gaya. Aur maan gaya ki, maine jo kaha tha, wo theek tha.

Kuch samay baad pata chala ki, us ladki ki tabiyat bahaut kharaab huayee, aur wo bed ridden ho gayee. Iske kuch aur samay baad wo is duniya se ruksat kar gayee. Us ladki ke wo shabd, aaj bhi mujhe yad hain. Wo waqui bahaut sundar, sahansheel, gheralu aur imaandaar ladki thi. Shayad uska mera utna hi saath tha.