Dating website per chat karte karte ek baar meri mulakaat ek aisee aurat se huayee. Jo ek badi hi famous company mein ucche ohade per karyarat thi. Lekin mujhe nahi maloom tha. Kafi communication ke baad hum dono ka phone per baat karna shuru hua.

Kuch samay baat karne ke baad use ehsaas ho gaya ki, main bhi ek bahaut hi acche khandaan se talluk rakhta hoon. Ab uska mera phone per baat karna aam ho gaya. Wo shaadishuda thi, uski 2 ladkiya bhi thi. Baad mein usne bataya ki, uska pati bhi sarkari mulazim hai aur sarkar ke kisi ucche pad per kaam karta hai. Uske bahaut saari aurto se samband bhi hain. Lekin wo usper bahaut shaq karta hai, aur kabhi kabhi to use aur apni ladkiyo ko maarta bhi hai. Isliye wo ek dost chahti hai, jisse wo phone per hi baat kar sake.

Hum dono ka phone per baat karna jaari tha. Ek din jab main office mein tha to shaam ko uska phone aaya. Kisi karanvash main uska phone nahi utha paya aur 1 ghante baad jab maine apne mobile phone per uska miss call dekha to usi samay use wapas phone kiya. Usne phone kaat diya, aur phir us din humaari koi baat nahi huayee.

Agle din subeh uska phone aaya aur usne mujhe bataya ki kal shaam ko jab maine use phone kiya tha, to uska pati bhi uske saath tha aur usne mera number dekh liya. Usne usper mere saath sambandh hoone ka lanchan lagaya. Uske mana karne per us raat usne meri dost ki khoob pitayee ki. Us din usne use itna mara ki, meri dost ki ek aankh kaali ho gayee thi. Iske baad meri dost ne apna tabadla (transfer) doosre shahr mein karwa liya aur court mein seperation ka case daal diya. Aur ab wo apna acche se reh rahi hai.

Hum dono 8 saal mein abhi tak nahi mile, lekin jab usne muje 6 saal baad apne baare mein bataya ki, mere us phone ke karan ye sab hua. To mujhe apne aap per sharam aayee. Maine usse sorry kaha. Lekin uska kehna ki ye accha hi hua kyunki wo uske saath nahi rehna chahti thi. Uski gaaliya, uske saath jabardasti sambhog karna uske pati ki aadat ho gayee thi. Lekin shayad mere phone se uski zindagi badal gayee hai aur ab wo bahaut khush hai.

Hum dono aaj bhi baat karte hain. Lekin 8 saalo mein abhi tak nahi mile. Shayad yahi ek sacchi dosti hai, Jisme na koi swarth hai, na koi chhal. Sirf ek doosre ke liyea pyar, sammaan, aadar aur care hai.